ബെന്നി കുട്ടനും അമ്മയും..

ബെന്നിയെ അറിയില്ലേ..?
ഒരു കൊച്ച് കരടി കുട്ടൻ..
ബെന്നി കുട്ടനെ എപ്പോഴും സന്തോഷത്തോടെ മാത്രമേ കാണാറുള്ളു,..
അതിന് മൂന്ന് കാരണങ്ങൾ ഉണ്ട്..
അവൻ എപ്പോഴും ആ മൂന്ന് പ്രിയപ്പെട്ട വിനോദങ്ങളിൽ ഏർപ്പെട്ടു കൊണ്ടേയിരിയ്ക്കും..
അവ എന്താണെന്നല്ലേ..?
ഒന്ന്..വയറു നിറയെ തേൻ കുടിയ്ക്കുക,
രണ്ട്..അത്യുച്ഛത്തിൽ പാട്ട് പാടുക,
മൂന്ന്..മതി മറന്ന് നൃത്തം ചെയ്യുക.
ഇവ മൂന്നും ഇല്ലാതെ ബെന്നി കുട്ടനെ കാണാൻ അസാധ്യമായിരുന്നു.

ഒരു കുന്നിൻ ചെരുവിലായിരുന്നു ബെന്നി കുട്ടന്റെ താമസം..
എന്നാൽ അവർക്ക് നിത്യവൃത്തിയ്ക്കുള്ള വെള്ളം നൽകിയിരുന്ന വട്ട കിണർ കുന്നിൻ മുകളിൽ ആയത് അവരെ വല്ലാതെ വിഷമിപ്പിച്ചു..
വീട്ടിലെ കുഞ്ഞും മറ്റു ജോലികളൊന്നും ഏൽപ്പിയ്ക്കാൻ ആവാത്തതു കൊണ്ടും കുന്നിൻ മുകളിലെ വട്ട കിണറ്റിൽ നിന്ന് വെള്ളം കോരി കൊണ്ടു വരുന്ന ജോലി ബെന്നി കുട്ടന്റേതായി..
ബെന്നികുട്ടനും എതിർപ്പൊന്നും പ്രകടിപ്പിയ്ക്കാതെ തന്റെ ജോലി കൃത്യമായി നിർവ്വഹിച്ചു പോന്നു..
പക്ഷേ ഒരു പ്രശ്നം..
കയ്യും കാലും വായും വെറുതെ വെയ്ക്കാൻ അറിയാത്ത ബെന്നി കുട്ടൻ,
കുടി വെള്ളം ബക്കറ്റുകളിൽ തൂക്കി കൊണ്ടു വരുമ്പോൾ ആടി പാടി രസിച്ച് കുന്നിൻ ചെരുവിൽ നിന്ന് ഓടി ഇറങ്ങി.,
അപ്പോൾ എന്താണ് സംഭവിയ്ക്കുക…?
രണ്ട് കൈകളിലും നിറഞ്ഞ് തുളുമ്പും ബക്കറ്റുകളിലെ വെള്ളം തൂക്കി കുന്നിൻ ചെരിവിലൂടെ ബെന്നി കുട്ടൻ ഓടി ഇറങ്ങി വീട്ടിൽ എത്തുമ്പോഴേയ്ക്കും കാലിയാകും..
ബെന്നി കുട്ടൻ എത്ര തവണ ശ്രമിച്ചിട്ടും വീട്ടിലേയ്ക്ക് ആവശ്യം വരുന്ന വെള്ളം നിറയ്ക്കുന്ന കൊച്ചു വീപ്പ സന്ധ്യയ്ക്കു മുന്നെ നിറയ്ക്കാനായില്ല.
ബെന്നി കുട്ടൻ ആദ്യമൊന്നും കാര്യമായി എടുത്തില്ലെങ്കിലും, പിന്നീട് അവന് സങ്കടം വരാൻ തുടങ്ങി..
സങ്കടം അടക്കാൻ വയ്യാതായപ്പോൾ അവൻ ഒരു ദിവസം തേങ്ങി തേങ്ങി അമ്മയുടെ മടിയിൽ കിടന്ന് വിങ്ങി പൊട്ടി പറഞ്ഞു,
അമ്മേ…..എനിയ്ക്ക് എന്തു കൊണ്ട് സന്ധ്യയ്ക്കു മുന്നെ വീപ്പ നിറയ്ക്കുവാൻ ഒരിയ്ക്കൽ പോലും ആവുന്നില്ല..?
ബെന്നി കുട്ടന്റെ സങ്കടം അമ്മയ്ക്കും സഹിയ്ക്കാനായില്ല..
ഉടൻ തന്നെ അമ്മ അതിനൊരു പരിഹാരം കണ്ടു..
ബെന്നി കുട്ടന്റെ രണ്ട് കൊച്ച് ബക്കറ്റുകൾക്കും അതിന്റെ അളവിനനുസരിച്ച് മൂടികൾ ഉണ്ടാക്കി കൊടുത്തു..

ഇപ്പോൾ ബെന്നി കുട്ടൻ വളരെ സന്തോഷത്തിലാണ്…
രണ്ട് കൈകളിലും വെള്ളം നിറച്ച അടച്ച ബക്കറ്റുകളോടെ അവൻ ഇഷ്ടം പോലെ തുള്ളിച്ചാടി, ആടിപ്പാടി, ആർത്തു രസിച്ച് കുന്നിൻ ചെരിവുകളിലൂടെ ഓടിയിറങ്ങി..
സന്ധ്യക്കു മുന്നെ ബെന്നി കുട്ടന് വീപ്പ നിറയ്ക്കാനായി..
പെട്ടെന്ന് ജോലി തീർന്ന് വരുന്ന ബെന്നി കുട്ടന് അമ്മ സ്നേഹത്തോടെ വയറു നിറയെ തേൻ വിളമ്പി..
ഇപ്പോൾ ബെന്നി കുട്ടന് മൂന്നല്ല…നാലാണ് വിനോദങ്ങൾ…
എന്താണ് പുതിയ വിനോദം എന്നല്ലേ..?
ഒന്ന്..വയറു നിറയെ തേൻ കുടിയ്ക്കുക,
രണ്ട്..അത്ത്യുച്ഛത്തിൽ പാട്ട് പാടുക,
മൂന്ന്..മതി മറന്ന് നൃത്തം ചെയ്യുക.
നാല്..കുന്നിൻ മുകളിൽ നിന്ന് വെള്ളം നിറച്ച ബക്കറ്റുകളുമായി ഓടി ഇറങ്ങുക..!



കൊച്ചു കൂട്ടരേ..
നമ്മെ സ്നേഹ വാത്സല്ല്യങ്ങൾ കൊണ്ട് പൊതിയുന്ന സ്നേഹ നിധി ആരാണ്..?
ഉം…അതെ, അമ്മ തന്നെ..
നമ്മുടെ കൊച്ചു സങ്കടങ്ങൾ ആവട്ടെ..വലിയ പ്രശ്നങ്ങൾ ആവട്ടെ.. പങ്കു വെയ്ക്കുവാനും സ്വീകരിയ്ക്കുവാനുമുള്ള നിറ കുടമാണ് അമ്മ മനസ്സ്..
നമ്മുടെ ഏത് വിഷമങ്ങൾക്കും പ്രശ്നങ്ങൾക്കും പരിഹാരം നീട്ടി തരുന്ന അമ്മയെ സ്നേഹിയ്ക്കുക…ബഹുമാനിയ്ക്കുക...!